Գալուստ Կիւլպէնկեան Հիմնարկութեան հայկական բաժանմունքը եւ Լիբանանի Ամերիկեան Համալսարանը (LAU) կը գործակցին հայկական դպրոցներուն մէջ հայերէնով դասաւանդող ուսուցիչներու վերորակաւորման համար։
Ծրագիրը մաս կը կազմէ 2019-ին Հիմնարկութեան կողմէ Լիբանանի համար նախատեսուած համընդհանուր ռազմավարութեան եւ նպատակն է քաջալերել նորարար մանկավարժական մօտեցումներն ու քննադատական մտածողութիւնը։
Յայտագիրը պատրաստուած է Լիբանանի Ամերիկեան Համալսարանի կրթական բաժանմունքին կողմէ եւ կ՚ընդգրկէ երկու տարուան վրայ երկարող դասընթացք մը, տեսական եւ գործնական բաղադրիչներով։ Դասաւանդուող նիւթերէն կարելի է նշել հետեւեալները՝ դասաւանդման եղանակներ, մանկավարժական տեսաբանութիւն, մանկական հոգեբանութիւն, յատուկ կրթութիւն եւ ուսումնառութեան ընթացքի գնահատում։ Ծրագիրը նաեւ կը բովանդակէ ծաւալուն կիրառական բաժին մը, որ պիտի քաջալերէ ուսուցիչները, որպէսզի իրենց նորայայտ գիտութիւնը կիրարկեն դասարաններէն ներս։
Դասընթացքի աւարտին, ուսուցիչներուն ուղղուած գրքոյկ մը պիտի հրատարակուի, հայերէն եւ անգլերէն լեզուներով։
