Անաւարտութիւն

Քերթուած ու վէպ, արձակ ու չափածոյ անաւարտութեան կնիքը կը կրեն էապէս։
Կարդացողը զանոնք կ՚աւարտէ միայն, իր կարգին, իր ետին ձգելով անաւարտութեան բացերը։ Կարդացողը չի կրնար զանոնք վերջացնել։ Ուրիշներ կու գան -եթէ երկը մոռցուած չէ կամ չէ լքուած- աւարտել երկը եւ զայն ձգել իրենց կարգին աւարտուն անաւարտ։ Որով այս աւարտը անհուն անաւարտութիւն մըն է, կարծէք երբեք իր կատարին չհասած ընթացք մը։