Կար ու չկար,
տնակ մը կար…
Տնակ տունիկ,
հազարաշէն երդիք,
վրան տանիք,
իսկ աջ կողմը
եւ ձախ կողմը,
քառասուն տուն,
քառասուն տանիք…
Քեռի Մինա՜ս…
Ի՞նչ կայ, ճաղա՛տ Ղուկաս…
Մեզի հիւր կու գա՞ս…
Կու գա՜մ, կու գա՜մ…
Քեռի Մինա՜ս…
Ի՞նչ կայ, ճաղա՛տ Ղուկաս…
Տըռ տըռ Ղազարին ալ լուր կու տա՞ս…
Կու տա՜մ, կու տա՜մ…
Քեռի Մինա՜ս…
Ի՞նչ կայ նորէն, ճաղա՛տ Ղուկաս…
Դհոլը զուռնան չմոռնա՜ս…
Տամպըտա տըմպա դհոլը,
տապատա տումպա դհոլը,
առի ելայ տանիքը,
խաղ կանչեցի տանիքէն,
ձայնս անցաւ
հովերէ՜ն, հովերէն, հովերէն…
Ծափի՛կ, ծափիկ ծիրանիկ,
կարմիր խնձոր կ՚նմանի,
ոսկի դեղձան մազերը,
հովը թել թել կը տանի,
հովը թել թել թող տանի…
Ինչո՞ւ ոսկի դեղձան մազեր…
Թող ըլլայ սեւ սեւ, գանգո՛ւր մազեր…
Ծափի՛կ, ծափիկ ծիրանիկ,
կարմիր խնձոր կ՚նմանի,
սեւ սեւ, գանգուր մազերը,
հովը թել թել կը տանի,
հովը թել թել թող տանի…
Տամպըտա տըմպա դհոլը,
տապատա տումպա դհոլը,
առի ելայ տանիքը,
խաղ կանչեցի տանիքէն,
ձայնս անցաւ
լեռներէ՜ն, լեռներէն, լեռներէն…
Լեռ ձոր, լեռ ձոր,
նորէ՛ն լեռ, նորէն ձոր,
քանի՞ լեռ, քանի՞ ձոր…
եօթը լեռ, եօթը ձոր…
Այն ո՞վ է…
Լեռնէն կու գայ,
ձորէն կու գայ,
կա՛թ կու տայ…
Ա՛յծ մը ունիմ ուլերով,
ի լի լի՜, դի լի լի՜…
Կա՛թ կը կթեմ աջ ձեռքով,
ի լի լի՜, դի լի լի՜…
Կա՛թ կը կթեմ աջ ձեռքով եւ ձախ ձեռքով,
ի լի լի՜, դի լի լի՜…
Այծ մը ունիմ ուլերով,
ի լի լի՜, դի լի լի՜…
Կաթ կը կթեմ աջ ձեռքով եւ ձախ ձեռքով,
ի լի լի՜, դի լի լի՜…
Լեռը ձորը,
կանանչ արտը…
Գացէք տեսէք ո՞վ է կերեր կանանչ արտը…
Լեռը ձորը,
կանանչ արտը եւ այծը պէ՜…
Գացինք տեսանք ա՛յծն է կերեր կանանչ արտը…
Կճղակները
տա՛մ տա՛մ, տը՛մ տա՛մ…
տա՛մ տա՛մ, տը՛մ տը՛մ տա՛մ…
Կճղակներով՝
տապա տիպա տա՛մ,
տապա տիպա տա՛մ,
տապա տիպա տա՛մ տապա,
տապա տիպա տա՛մ…
Կոտոշները
տա՛մ տա՛մ, տը՛մ տա՛մ…
տա՛մ տա՛մ, տը՛մ տը՛մ տա՛մ…
Կոտոշներով
տա՛մ, տապա տամ, տապա տիպա տա՛մ…
տապատա տը՛մ տա՛մ, տապա տիպա տա՛մ…
Կոտո՜շ կոտո՜շ,
այծի՛ կոտոշ, պէ՜…
Կոտո՜շ կոտո՜շ,
գայլի՛ կոտոշ…
Գայլի՞ կոտոշ…
Խաբեցի՛, խաբեցի՛,
մուկը ծակէն հանեցի,
ալիւրին մէջ թաթխեցի,
առա՛նց իւղի տապկեցի,
Տըռ տըռ Ղազարին կերցուցի…
Անո՛ւշ ըլլայ, հա հա հա՜…
Գայլը կոտոշ ունի՞…
