Պաթոլա կամ Բատոլա – պատկեր գ

Մէկ երկու, Քեռի Մինաս…
Երեք չորս, խը՜ռ խըռ կը քնանաս…
Հինգ վեց, անկողինէն վա΄ր կ’իյնաս, կ’արթննաս…
Եօթը ութ, դուռը կը բանաս…
Ինը տասը, վա΄յ, Քեռի Մինաս,
առանց տաբատի ո՞ւր կ’երթաս…

Մէկ երկու, Քեռի Մինաս…
Երեք չորս, խը՜ռ խըռ կը քնանաս…
Հինգ վեց, անկողինէն վա΄ր կ’իյնաս, կ’արթննաս,
տաբատդ հագնելու չմոռնա՜ս…
Եօթը ութ, դուռը կը բանաս…
Ինը տասը, վա΄յ, Քեռի Մինաս,
առանց շապիկի ո՞ւր կ’երթաս…

Մէկ երկու, Քեռի Մինաս…
Երեք չորս, խը՜ռ խըռ կը քնանաս…
Հինգ վեց, անկողինէն վա΄ր կ’իյնաս, կ’արթննաս,
շապիկդ հագնելու չմոռնա՜ս…
Եօթը ութ, դուռը կը բանաս…
Ինը տասը, վա΄յ, Քեռի Մինաս,
առանց կօշիկի ո՞ւր կ’երթաս…

Մէկ երկու, Քեռի Մինաս…
Երեք չորս, խը՜ռ խըռ կը քնանաս…
Հինգ վեց, անկողինէն վա΄ր կ’իյնաս, կ’արթննաս,
կօշիկդ հագնելու չմոռնա՜ս…
Եօթը ութ, դուռը կը բանաս…
Ինը տասը, վա΄յ, Քեռի Մինաս,
կօշիկդ կապէ, վար չիյնա՜ս…

Մէկ երկու, Քեռի Մինաս…
Երեք չորս, խը՜ռ խըռ կը քնանաս…
Հինգ վեց, անկողինէն վա΄ր կ’իյնաս, կ’արթննաս,
կօշիկդ կապելու չմոռնա՜ս…
Եօթը ութ, դուռը կը բանաս…
Ինը տասը, վա΄յ, Քեռի Մինաս,
առանց մեզի ո՞ւր կ’երթաս…

Համբերէ՜, հիմա կը գիտնաս…

Մէկ երկու, աստիճանէն վե΄ր կ’ելլես…
Երեք չորս, օձին գլուխէն վա΄ր կ’իջնես…
Հինգ վեց, զո΄յգ զառերը կը գլորես…
Եօթը ութ, մինչեւ հարիւր կը համրես…
Ինը տասը, կը հասնիս կրկէս…

Ժամը ճի΄շդ հինգուկէս…
Հինգուկէ՞ս թէ վեցուկէս…
Երէկուան պէս, եօթուկէս…
Մուտքը ազատ է, հրամմէ ներս…

Կրկէսին մէջ` այն ո՞վ է…
Լարին վրայ կ’երթա՜յ, կու գայ,
վե՜ր վար կը խաղայ…

Վա՛յ, Քեռի Մինաս,
լարին վրայ կ’երթա՜ս, կու գաս,
վար չիյնա՜ս…

Քեռի Մինասը` լարախաղաց,
մենք մնացինք ապշած` բերաննիս բաց…

Բերա΄նդ գոցէ,
ճա΄նճ կը մտնէ…

Ճանճին պատմութիւնը գիտե՞ս…
Ո΄չ…
Ոչ` ըսելէն բան մը չ’ելլեր,
ճանճին պատմութիւնը գիտե՞ս…
Ըսի ո΄չ…

Մեր խաղին մէջ ո΄չ մը կայ…
Ո՞չ, թէ որջ…

Մեր խաղին մէջ ո΄րջ մը կայ, օ՜հ…
Որջին մէջը ա΄րջ մը կայ, ա΄հ…
Կը քնանա՜յ, հա՜…
Ե՞րբ պիտի արթննայ…
Երբ Բարեկենդա΄նը գայ, ա΄հ…

Գացէք տեսէք ո՞վ է կերեր գայլը…
Գացինք տեսանք ա΄րջն է կերեր գայլը…

Արջը գայլը, գայլը այծը, այծը արտը,
ետքայլ՝
արտը այծը, այծը գայլը, գայլը արջը…

Խնդալի՞ք թէ վախնալիք… Վախնալի՜ք…
Վախէն սի΄րտը կը փրթի, չը΄րթ փըրթ…

Տըռ տը΄ռ Ղազար, Վախկո΄տ Ղազար,
քա΄ջ եղիր, մի΄ վախնար…

Ժնջի՜լ ժնջիլ, կանանչ խոտը ո՞ւր է…
Ա΄յծը կերաւ…
Ժնջի՜լ ժնջիլ, այծը ո՞ւր է…
Գա΄յլը կերաւ…
Ժնջի՜լ ժնջիլ, գայլը ո՞ւր է…
Ա΄րջը կերաւ…
Ժնջի՜լ ժնջիլ, արջը ո՞ւր է…

Գացէք տեսէք ո՞վ է կերեր արջը…
Գացինք տեսանք սո΄ւրն է կերեր արջը…

Սուրը արջը, արջը գայլը՝ Գիմով գայլը,
գայլը այծը, այծը արտը,
ետքայլ՝
արտը այծը, այծը գայլը՝ Գիմով գայլը,
գայլը արջը, արջը սուրը…

Սուրը սո΄ւր է,
սուրը բո΄ւթ է,
սո΄ւր է, բո΄ւթ է,
ժանգոտած է…

Ժա΄նգը… Ժա΄նգը…
Վտա΄նգը… Վտա΄նգը…
Ահազա΄նգը`
Մի՜… նա՜ս…
չիյնա՜ս… չիյնա՜ս…
Ղո՜ւ կա՛ս…
կո՜ւ գա՛ս… կո՜ւ գա՛ս…